Mong kristin úr økinum flyta av landinum, bæði vegna atsókn, vápnaðar ósemjur, stríð millum trúarbólkar og vantandi framtíðarútlitum hjá tí einstaka.
Í Iran er politiska veðurlagið vorðið meira kúgandi, eftir tey víðfevndu mótmælini í sambandi við deyða Mahsa Amini í 2022.
Kristin, sum alment játta sína trúgv, eru í vanda fyri hørðum revsingum frá myndugleikunum, eitt nú fongsul, órættvísum rættargangi, píning, eftirliti og trýsti um at venda aftur til islam.
Í Egyptalandi hevur staturin tikið anti-kristiligt haturstilfar burtur úr skúlabókum, men kirkjur verða framvegis álopnar. Í økinum við Nílánna verða ungar kristnar kvinnur framvegis burturfluttar, noyddar at skifta trúgv og tvungnar inn í hjúnaband, uttan at myndugleikarnir lata við seg koma.
Í Sýria vekir verandi stýrið stúran millum kristin, sum framvegis flýggja úr landinum. Síðani Assad-stýrið fall, eru hundraðtals drúsar, kristin, alawittar og sunnimuslimar dripnir í samanbrestum millum vápnaðar felagssakapir og stjórnarhermenn.
