Harðskapur, ótti og mangul á neyðsynjarvørum seta sín dám á gerandisdagin í Jemen. Samstundis royna tey kristnu at halda fast við vónina, boða evangeliið og stuðla hvør øðrum mitt í einari støðugt álvarsamari kreppu.
Fleiri kristnir fangar eru nýliga latnir leysir, og tað hevur elvt til stóra gleði og takksemi. Men gleðin er blandað við stúran. Nógv teirra, sum eru latin leys, eru nú í eini truplari støðu, har tey skulu royna at byggja lív sítt uppaftur mitt í kríggi og ófriði.
Samstundis merkja nógvar familjur álvarsligu avleiðingarnar av krígnum. Í býnum Taiz hevur tørvurin á neyðsynjarvørum elvt til stóra neyð. Ein kristin maður greiðir frá, at kona hansara, sum stríðist við krabbamein, ikki longur fær tann heilivágin, sum hon hevur tørv á.
Stór stúran er eisini um ein kristnan mann, sum varð tikin og afturhildin við eina eftirlitsstøð, meðan hann var á veg til flogvøllin fyri at fara av landinum. Samstarvsfelagarnir hava ikki fingið samband við hann, og eingin veit, hvussu hann hevur tað í løtuni.
Hóast ótta, miss og oyðilegging halda tey kristnu í Jemen fram við at seta álit sítt á Gud. Tey heita á kirkjuna kring allan heimin um at standa saman við teimum í forbøn, meðan tey framvegis royna at vera ljós í myrkrinum og bera vónina um Jesus út til fólkini rundan um seg.
BIÐIÐ
- Biðið um, at harðskapurin í Jemen má steðga, so fólk um alt landið kunnu fáa frið.
- Biðið fyri teimum kristnu, sum eru latin leys, og familjum teirra. Biðið um vísdóm, troyst og lekidóm, og at tey verða væl móttikin í nærumhvørvi sínum.
- Biðið fyri tí afturhildna kristna manninum og familju hansara, um vernd, verju og troyst og at tey skjótt kunnu síggjast aftur.
- Biðið eisini um, at Gud syrgir fyri familjum, sum mangla mat, heilivág og aðrar neyðsynjarvørur.
Kelda: OpenDoors
